НҮҮР » Мэдээ

Мэдээ

Мэдээ  / Шинэ мэдээ
“Цагааннуур” чөлөөт бүсийн албан хаагчид “Алтанбулаг” чөлөөт бүсийн үйл ажиллагаатай танилцлаа
Admin нийтлэгдсэн 2019-06-26


Захирагчийн 2019 оны 6-р сарын 19-ний өдрийн А/10 захирамжийн дагуу Захирагчийн ажлын албаны дарга Ц.Итгэл тэргүүтэй  ажлын албаны албан хаагчид 2019 оны 06 дугаар сарын 20, 21-ний өдрүүдэд “Алтанбулаг” чөлөөт бүсэд албан томилолтоор ажиллав.

Томилолтын хугацаанд Алтанбулаг чөлөөт бүсэд улсын төсвийн хөрөнгө оруулалтаар хийгдсэн бүтээн байгуулалтын ажлууд, тус чөлөөт бүсэд үйл ажиллагаагаа өдөр тутам хэвийн явуулж буй Гааль, Хилийн цэргийн иргэдийг нэвтрүүлэх, шалгах, бүртгэх бүртгэлийн үйл ажиллагааг газар дээр нь үзэж танилцав. 

Мөн тус бүсэд үйл ажиллагаа тогтмол явуулж байгаа “Оол монголиан интернэшнл нетворк чөлөөт бүс” ХХК, “Ангара дэвших трейд чөлөөт бүс” ХХК, “Алтанбулаг дюти фрий чөлөөт бүс” ХХК зэрэг аж ахуйн нэгжүүдийн үйл ажиллагааг үзэж сонирхов. Өнөөгийн байдлаар 15 аж ахуйн нэгж, байгууллага тус чөлөөт бүсэд хэвийн үйл ажиллагаагаа явуулж байгаа юм байна.


Цааш унших
0
0

Мэдээ  / Шинэ мэдээ
Монгол, Казахстаны бизнес уулзалтад оролцлоо
Admin нийтлэгдсэн 2019-06-26


МҮХАҮТ, БНКазУ-ын Аж Үйлдвэр, Дэд Бүтцийн Хөгжлийн Яам, Казахстаны Олон Улсын Худалдааны Танхим болон Казахстаны Бизнес Эрхлэгчдийн Үндэсний Танхим “Атамекен”-тай хамтран Монгол, Казахстаны бизнес уулзалтыг зохион байгуулж “Цагааннуур” чөлөөт бүсийн захирагчийн Ажлын албанаас оролцож мэдээлэл авлаа.

Уулзалтын үеэр МҮХАҮТ-ын Ерөнхийлөгч О.Амартүвшин хэлэхдээ, “Манай улс ДХБ-ын гишүүн гэдгээр дэлхийн олон оронтой жигд харилцах эрхийн хүрээнд гадаад худалдаа хийж байгаа боловч бүс нутгийн орон зай, зах зээлийн боломжийг зайлшгүй ашиглах ёстой. Үүнийг алс холын Вьетнам улс ашиглан Казахстантай хийх худалдаагаа 10-20 дахин өргөжүүлж байхад бид ойрын зах зээл болох тус улстай харилцах боломжоо ашиглахгүй байна. Манай улсын гадаад худалдаа 2019 оны дөрөвдүгээр сарын байдлаар 4.1 тэрбум ам.долларт хүрээд байгаа ч энэ үзүүлэлтийн 0.2 хувьтай тэнцэх хэмжээний худалдааг бид Казахстан улстай хийж байгаа нь үнэхээр чамлахаар тоо юм. Тиймээс бид Казахстантай харилцаж хамтран ажиллах боломжоо алдах ёсгүй. Хоёр улсын хооронд бие биеэ дэмжин хамтарч ажиллах боломж бололцоо их бий” гэлээ.  

Уулзалтад Казахстаны талаас хүнс, хүнд машин, механизм, техник угсралт, эмийн худалдаа, барилга, машин үйлдвэрлэлийн 11 компани, Монголын 67 компанийн 90 гаруй төлөөлөл оролцлоо.

Монголчуудын сайн мэдэх Казахстаны хүнсний үйлдвэрлэл, худалдааны “Eurasian foods”, “Султан маркетинг”, автомашин үйлдвэрлэлийн “Сарыарка Автопром”, “Hyundau comtrans Kazakhstan”, барилгын дулаалгын материалын “Izoterm”, нэхмэлийн “Бал текстиль”, арматур, төмөрлөгийн “Бёмер”, “Жас-Канат”, уул уурхайн бүтээгдэхүүний “Минова Казахстан”, эмийн үйлдвэрлэлийн “ТК фарм”, цонх, хаалганы үйлдвэрлэлийн “Форес” компаниуд уулзалтад оролцож, бүтээгдэхүүний дээжээсээ сонирхуулав.

Бизнес уулзалтын хүрээнд Казахстаны  ААН, компанийн төлөөлөл Монголын томоохон үйлдвэрүүдийн үйл ажиллагаатай танилцаж, хөрөнгө оруулалтын бодлого, орчны талаар мэдээлэл авч, B2B буюу нүүр тулсан бизнес уулзалтыг хийлээ.

Монгол Улсын гадаад худалдааны нийт бараа эргэлт 2019 оны эхний 4 сарын байдлаар 4,1 тэрбум ам. долларт хүрч, өнгөрсөн оны мөн үеийнхээс 15,4 хувиар буюу 571 сая ам. доллараар нэмэгдсэн байна. Казахстан улс руу 306,1 мянган ам. долларын ноос, ноолууран бүтээгдэхүүний экспорт хийгдсэн бол Казахстанаас 7,6 сая ам. долларын цай, ургамлын тос, хөвөн бөс бараа, хүнсний бүтээгдэхүүн, тамхи, давсны импорт хийгджээ. 

Түүнчлэн Казахстаны талын мэдээлснээр, тус улсад Монголын талын оролцоотой 32 байгууллага, ААН-ийн төлөөлөгчийн газар бүртгэгдсэнээс 23 нь идэвхтэй ажиллаж байна.


Цааш унших
0
0

Мэдээ  / Шинэ мэдээ
КАЗАХСТАН УЛСЫН ХУДАЛДАА, ЭДИЙН ЗАСГИЙН АЙЛЧЛАЛ БОЛЛОО
Admin нийтлэгдсэн 2018-10-06


МҮХАҮТ, БНКазУ-ын Үндэсний танхим “Атамекен”, Казахстаны Гадаад худалдааны танхим, БНКазУ-ын Хөрөнгө оруулалт, хөгжлийн яам, Монгол Улс дахь БНКазУ-ын ЭСЯам хамтран “БНКазУ-ын худалдаа, эдийн засгийн айлчлал”-ыг зохион байгууллаа.

Энэ удаагийн айлчлалын бүрэлдэхүүнд Казахстаны талаас эрчим хүч, барилга, эрүүл мэнд, боловсруулах үйлдвэрийн чиглэлийн аж ахуйн нэгжүүд хүрэлцэн иржээ. Манай хоёр улсын гадаад худалдааны бараа эргэлт 2017 оны байдлаар 74.8 сая ам.долларт хүрснээс экспорт 72.5 сая, импорт 2.3 хувийг эзлэж байна.

Казахстаны Гадаад худалдааны танхимын Удирдах зөвлөлийн орлогч дарга Н.А.Букейханов уулзалтын эхэнд хэлэхдээ “Сүүлийн жилүүдэд Монгол Улс, БНКазУ-ын худалдаа, эдийн засгийн хамтын ажиллагаа эрчимтэй хөгжиж байна. Хоёр улсын бизнес эрхлэгчид харилцаагаа улам бэхжүүлэн бүхий л салбарт шинэ харилцаа, хамтын ажиллагааг өргөжүүлэхээр ажилласаар байгаа. Хоёр улс дэд бүтэц, хөдөө аж ахуй, эрчим хүч болон эмийн үйлдвэрийн салбарт хамтын ажиллагааг хөгжүүлэх таатай ирээдүй харагдаж байна хэмээн цохон тэмдэглэв. Уулзалтаар бизнес эрхлэгчид шинэ түншээ олох, хөрөнгө оруулалт татах, хоёр орны зах зээлд харилцан нэвтрэх боломжуудыг ярилцлаа.

Түүнчлэн БНКазУ-ын Элчин сайдын яамны Элчин зөвлөх Айдар Абишев “Казахстан Улс тамхи болон рапсын экспортоор тэргүүлдэг. Казакстанаас Монгол руу чиглэсэн импорт тогтмол нэмэгдэж байна. Өнөөдөр хоёр улсын хооронд 50 орчим гэрээ хэлэлцээр мөрдөгдөж байна, цаашид худалдаа эдийн засгийн хамтын ажиллагаа улам бүр өргөжинө гэдэгт итгэж байна” гэв.

Уулзалтын үеэр хоёр орны худалдааны эргэлтэд өгөөжөө өгөх “Цагааннуур” чөлөөт бүс”-ийн танилцуулга мэдээлэл, Казахстаны талаас “Ново-Альджанский мелькомбинат”, манай талаас “Ангара дэвших трейд” компаниуд танилцуулга хийлээ.

Мөн ганцаарчилсан уулзалтууд зохион байгуулж бизнесийн боломжуудаа ярилцав. Казахстаны бизнес эрхлэгчдийг төлөөлөн вакуум цонхны үйлдвэрлэлээр дэлхийд томоохонд тооцогддог “Nedex Almaty”, мөн хүнсний үйлдвэрлэлээрээ Казахстан төдийгүй Төв Азид танигдсан “Eurasian foods corporation” болон “Баян Сулу” зэрэг аж ахуйн нэгжүүд хүрэлцэн иржээ.

Уулзалтын үр дүнд дээрх компаниудыг Монголын бизнес эрхлэгчид холбогдох байгууллагуудтай холбоо тогтоох, түншийн харилцаа үүсгэхэд нь дэмжлэг үзүүлэх юм. Хэдийгээр хоёр улсын гадаад худалдааны эргэлт нэмэгдэж, харилцан ашигтай хамтран ажиллаж байгаа ч ОХУ-ын нутаг дэвсгэрээр дамжин өнгөрдөг тээвэр логистикийн асуудал өртөг өндөртэй, хүнд сурталтай байдаг талаар ярьж байлаа. Цаашид бизнес эрхлэхэд тохиолддог бэрхшээлийг үе шаттайгаар бууруулах тал дээр хоёр тал санал нэгдэв.


Цааш унших
0
0

Мэдээ  / Шинэ мэдээ
ДЭЛХИЙН ХУДАЛДААНЫ БАЙГУУЛЛАГААС БАТАЛСАН ГЭРЭЭ ХЭЛЭЛЦЭЭРҮҮДИЙГ СУДЛАВ
Admin нийтлэгдсэн 2018-05-29


Гадаад харилцааны яам, ДХБ-ын Судалгааны төв, Нью Дели экспортыг дэмжих төсөл, Дэлхийн банк, МҮХАҮТ хамтран “Экспортын үйл ажиллагаанд Дэлхийн худалдааны байгууллагын хэлэлцээрүүдийн ач холбогдол” сургалтыг зохион байгууллаа. Сургалтаар Дэлхийн Худалдааны Байгууллагын ерөнхий мэдээлэл, ХАА-н тухай хэлэлцээрийн үндсэн асуудлууд, хүнсний аюулгүй байдал ба Засгийн газрын нөөц бүрдүүлэх хөтөлбөр, хөгжиж буй орнуудад тулгарч буй сорилтууд, ДХБ-ын худалдааны зохицуулалтын арга хэрэгсэл, татаас болон саармагжуулах арга хэмжээний хэлэлцээр, хамгаалалтын арга хэмжээний тухай хэлэлцээр, маргаан шийдвэрлэх механизм зэрэг сэдвээр мэдлэг, мэдээлэл өгч “Цагааннуур” чөлөөт бүсийн Захирагчийн Ажлын албаны мэргэжилтнүүд ДХБ-ын хөдөө аж ахуйн хэлэлцээрийн талаар мэдлэг, мэдээллээ авч ДХБ- аас баталсан гэрээ хэлэлцээрүүдийн ялгаа, онцлог, тэдгээрийг үйлдвэрлэлийн салбарт хэрхэн хөгжүүлэх, эдийн засгийн хөгжлийг даган ажил эрхлэлтийн бодлогод хэрхэн тусгах зэрэг илүү гүнзгий мэдээлэлтэй болсон юм.


Цааш унших
0
0

Мэдээ  / Шинэ мэдээ
“АЯЛАЛ ЖУУЛЧЛАЛ БА ЧӨЛӨӨТ БҮСИЙН ХӨГЖИЛ” ЗӨВЛӨГӨӨН БОЛЛОО
Admin нийтлэгдсэн 2018-04-23


Аялал жуулчлалын салбар нь бусад салбаруудтай нягт холбогддог онцлогтой бөгөөд эдгээр нь харилцан нэгнээ хөгжүүлэх үндэс суурь болдог. Тиймээс чөлөөт бүс болон Монгол улсын эдийн засгийн хөгжилд аялал жуулчлалын салбарын оролцоо, хувь нэмрийг тодорхойлж, хөгжлийг дэмжих зайлшгүй хэрэгцээ шаардлагын үндсэн дээр Байгаль орчин, аялал жуулчлалын яам “Аялал жуулчлал ба чөлөөт бүсийн хөгжил” сэдэвт зөвлөгөөн зохион байгууллаа. Уг зөвөлгөөнд Шадар сайдын ажлын алба, Үндэсний аюулгүй байдлын зөвлөлийн ажлын албаны төлөөлөл, Замын-Үүд чөлөөт бүсийн захирагчийн ажлын алба, Алтанбулаг чөлөөт бүсийн захирагчийн ажлын алба, Цагаан нуур чөлөөт бүсийн захирагчийн ажлын албаны төлөөлөгчид оролцсон юм.

Чөлөөт бүсүүдийн хөгжлийг хангахад тогтвортой ажлын байр бий болгох,  орон нутгийн иргэдийн амьжиргааг дээшлүүлэхэд аялал жуулчлалын салбарын оруулах хувь нэмрийг тодорхойлоход холбогдох талуудын санал, бодлыг тусгах нь уг зөвлөгөөний зорилго юм. Нөгөөтэйгүүр, аялал жуулчлалын салбарыг хөгжүүлэх шинэ бодлогыг тодорхойлох арга хэрэгслийг бий болгох, нэвтрүүлэх замаар эдийн засгийн хөгжилд хувь нэмэр оруулахад холбогдох талуудын санал, бодлыг тусгах зайлшгүй шаардлага тулгараад байгааг зөвлөгөөнд оролцогчид хэлж байлаа.


Цааш унших
0
0

Мэдээ  / Шинэ мэдээ
МОНГОЛ-КАЗАХСТАНЫ ЗГХК-ЫН ДОЛДУГААР ХУРАЛДААН АСТАНА ХОТОД БОЛЛОО
Admin нийтлэгдсэн 2018-04-05


Худалдаа, эдийн засаг, шинжлэх ухаан, техник, соёлын хамтын ажиллагааны Монгол-Казахстаны Засгийн газар хоорондын комиссын ээлжит долдугаар хуралдаан Астана хотноо болж хуралдааны протоколд талууд гуравдугаар сарын 29-нд гарын үсэг зурлаа.

Хоёр жил тутам хийж байхаар тохирсон ч бүтэн дөрвөн жил өнжсөн хуралдаанаар хоёр орны худалдаа, эдийн засаг, хөрөнгө оруулалт, бизнесийн хамтын ажиллагаа болон уул уурхай, тээвэр, байгаль орчин, хөдөө аж ахуй, боловсрол, шинжлэх ухаан, соёлын салбарт хамтын ажиллагааг эрчимжүүлэх чиглэлээр талуудаас гаргасан саналуудыг нэг бүрчлэн хэлэлцэж харилцан тохиролцоонд хүрсэн бөгөөд Засгийн газар хоорондын комиссын Монголын талыг Хөдөлмөр, нийгмийн хамгааллын сайд С.Чинзориг, Казахстаны талыг тус улсын Хөдөлмөр, хүн амын нийгмийн хамгааллын сайд М.Е.Абылкасимова нар ахалсан юм.

Астанад өвөл хараахан буцаагүй цаг агаар сэрүүхэн байсан ч хоёр улсын Засгийн газар хоорондын комиссын хуралдааны танхимд бие биенээ хүндэтгэсэн найрсаг дотно харилцааны халуу дүүгсэн уур амьсгал ноёлж байлаа. Хоёр талын ажлын хэсгийнхэн бэлтгэлийг нь сайн хангасны үр дүнд хуралдаан товлосон хугацаандаа амжилттай болж, төлөвлөсөн асуудлуудаа хэлэлцэн, нэгдсэн шийдэлд хүрч чадсан гэдгийг комиссын гишүүд үнэлж байсан бөгөөд  хэлэлцсэн асуудлуудын талаар тоймлон хүргэж байна.

Чөлөөт худалдааны хэлэлцээртэй холбоотой Монголын талын саналыг дэмжлээ
Монгол Улс, БНКУ-ын худалдааны эргэлт 2017 оны эцсийн байдлаар 36.6 сая ам.доллар болж, өмнөх оны мөн үетэй харьцуулахад 22хувиар өсчээ. Үүнээс Монголын экспорт 2.4 сая ам.доллар, Казахстанаас хийсэн импорт 34.2 сая ам.долларын дүнтэй гарсан нь өмнөх оны мөн үетэй харьцуулахад экспорт гурав дахин, импорт 16.6 хувиар өссөн дүнтэй байгааг талууд хангалттай биш хэмээн үзэж худалдааны салбарын хамтын ажиллагааг өргөжүүлэх нөөц бололцоо их бий гэдэгт санал нэгдсэн юм. Түүнчлэн хуралдаанаар экспортын бараа, бүтээгдэхүүний нэр төрлийг олшруулах, улмаар худалдааны эргэлтийг нэмэгдүүлэх чиглэлээр хамтран ажиллахаар тохирч, харилцан экспортлох боломжтой бараа, бүтээгдэхүүний жагсаалтыг холбогдох аж ахуйн нэгжүүдийн мэдээллийн хамтаар солилцлоо. Монголын талын тавьсан худалдааны харилцаан дахь тарифын болон тарифын бус хориг саадыг арилгах, түүнчлэн худалдаа, эдийн засгийн хамтын ажиллагааг шинэ шатанд гаргах зорилгоор Евразийн эдийн засгийн холбоотой Чөлөөт худалдааны хэлэлцээр байгуулах ач холбогдлыг судлах хамтарсан судалгааны ажлыг эхлүүлэх саналыг дэмжиж буйгаа Казахстаны тал илэрхийлж энэ тухайгаа Евразийн эдийн засгийн комисст ойрын хугацаанд мэдэгдэхээр болов.
Астана-Улаанбаатар чиглэлд нислэг нээх санал тавив
Хуралдаанаар Казахстаны тал өөрийн улсын хөрөнгө оруулалтын нөхцөл байдал болон хөрөнгө оруулалт шаардагдаж буй аж үйлдвэр, инновацийн төслүүдийн талаар Монголын талд танилцуулж хамтран ажиллаж, харилцан хөрөнгө оруулж болох хэд хэдэн чухал саналыг ярилцсан юм. Тухайлбал, “Цагааннуур” чөлөөт бүсийн үйл ажиллагааг сайжруулах зорилгоор Казахстаны туршлагыг судлах, мөн тус бүсэд мэргэжилтэн урьж ажиллуулах хүсэлтээ манайхан илэрхийлсэн бол Казахстаны тал чөлөөт бүст үйлдвэр, худалдаа эрхлэх, хөрөнгө оруулах сонирхолтой аж ахуйн нэгжүүдийн талаарх мэдээллийг Монголын талд хүргүүлэхээр тохирсон. Энэ удаагийн хуралдаанаар хэлэлцсэн асуудлын нэг нь тээврийн салбарын хамтын ажиллагааг эрчимжүүлэх байсан бөгөөд ОХУ-ын нутаг дэвсгэрээр дайран өнгөрдөг авто замаар Казахстан болон Монгол Улсыг холбох оновчтой хувилбарын талаар болон Астана-Улаанбаатар, Усть-Каменогорск-Өлгий-Ховд чиглэлийн нислэг нээх асуудлыг хэлэлцээд Нислэгийн хайлт болон аврах салбарт хамтран ажиллах тухай Засгийн газар хоорондын хэлэлцээрийг эцэслэн байгуулах ажлыг үргэлжлүүлэхээр болов.
Уранаар хамтарсан төсөл хэрэгжүүлэх боломжтой
Монгол Улсад уран боловсруулах үйлдвэр байгуулах боломжийн талаар хамтарсан судалгаа хийx, ураны олборлолт, боловсруулалтын чиглэлээр хамтарсан төсөл хэрэгжүүлэх, ураны салбарын инженер, техникийн ажилчдыг бэлтгэх, давтан сургах зэрэгт хамтран ажиллах боломжтой тухай энэ хуралдаанаар нэлээд нухацтай ярилцлаа. Евразийн Эдийн засгийн холбооны дүрэм журмын хүрээнд мах махан бүтээгдэхүүн экспортлох боломжтой гэдгийг Казахстаны тал дуулгаад өөрийн улсаас мах, махан бүтээгдэхүүн импортлохтой холбоотой мэдээллийг манай улсын холбогдох байгууллагад ирүүлэхээр болов. Казахстаны цагаан толгойт үүлдрийн үхрийг сайжруулагчаар импортлох, гүн хөлдөөсөн үр авах,  үр тариа, жимс жимсгэнийн таримлын сортуудыг нутагшуулах чиглэлээр хоёр улс хамтран ажиллах сонирхлоо харилцан илэрхийлж Засгийн газар хоорондын комиссын хуралдааны протоколд тэмдэглүүлсэн нь хөдөө аж ахуйн салбарын хамтын ажиллагааг эрчимжүүлэхэд ихээхэн тустай ажил хэмээн оролцогчид үнэлж байлаа.
Оюутны тоог нэмж, хамтарсан судалгааны баг ажиллуулна
Энэ удаагийн хуралдаанаар талууд “Дээд боловсролын баримт бичиг харилцан хүлээн зөвшөөрөх тухай Монгол Улсын Засгийн газар, Бүгд Найрамдах Казахстан Улсын Засгийн газар хоорондын хэлэлцээр”-ийн төслийг 2018 ондоо багтаан эцэслэх чиглэлээр ажиллахаар болжКазахстаны Засгийн газрын зардлаар суралцагч монгол оюутны тоог хоёр дахин нэмэх хүсэлтийг Монголын талаас тавьсан. Шинжлэх ухааны салбарт хамтарсан судалгааны төсөл, хөтөлбөрүүдийг хэрэгжүүлэх, туршлага солилцох зэрэг ажлыг хийх замаар хамтын ажиллагааг идэвхжүүлэхээр тохиролцов. Тодруулбал, 2018-2020 онд VI-VIII зууны түргийн соёлд хамаарах Шивээт улаан цогцолборт археологийн судалгаа явуулах,  Казахстаны нутаг дэвсгэрт буй Зүчи хааны бунхныг хамтран судлах, Монголд байгаа эртний түрэг үндэстний соёлын өв болох Майхан уул /Шатыртау/ газар доорх бунхны археологийн олдворуудыг сэргээн засах, хадгалах зэрэг ажлыг хийх боломжтой юм байна.
Астанагийн хот төлөвлөлт, Алматыг нүүлгэсэн туршлагыг судална
Хоёр улсын хил орчмын аялал жуулчлалын маршрут гаргах, газар хөдлөлт, барилгын материалын лаборатори, үйлдвэрлэлийг хөгжүүлэх чиглэлээр хамтран ажиллахаар ярилцаж, Казахстаны тал Астана хотын төлөвлөлт, Алматы хотыг нүүлгэн шилжүүлсэн туршлагыг судлах Монголын талын хүсэлтийг дэмжсэн юм. Монгол Улс, Казахстан Улсын Засгийн газар хоорондын Нийгмийн хамгааллын хэлэлцээрийг шинээр байгуулах ажлыг эрчимжүүлэхээр болсон талууд хоёр талын харилцааг бүх чиглэлээр өргөжүүлэн хөгжүүлэхэд улс төрийн харилцаа чухал ач холбогдолтой бөгөөд цаашид хоёр улсын хоорондын дээд болон өндөр түвшний уулзалт яриа хэлэлцээний давтамжийг хадгалах, холбогдох яам, газруудын харилцааг холбоог өргөжүүлэхэд анхаарах учиртайг мөн санал нэгтэйгээр тэмдэглэсэн юм.

2014 оноос хойш хуралдаагүй Засгийн газар хоорондын комиссын энэ удаагийн хуралдаанаар хоёр орны харилцаа хамтын ажиллагааг шинэ шатанд гаргах олон чухал асуудлыг хэлэлцсэнээс гадна Ялтан шилжүүлэх гэрээ, Монгол Улсын Шудрага өрсөлдөөний төлөө газар Казахстан улсын Өрсөлдөөнийг хамгаалах зүй ёсны монополийг зохицуулах хороотой хамтран ажиллах, харилцан ойлголцлын санамж бичиг, Нислэгийн хайлт болон аврах салбарт хамтран ажиллах тухай хэлэлцээр зэрэг баримт бичигт гарын үсэг зурлаа.


Цааш унших
0
0

Мэдээ  / Шинэ мэдээ
А.АМАНКЕЛДИ: ЦАГААННУУРЫН ЧӨЛӨӨТ БҮСЭД 2011 ОНООС ХОЙШ УЛСЫН ТӨСВӨӨС ХӨРӨНГӨ ОРУУЛАЛТ ХИЙГДЭЭГҮЙ
Admin нийтлэгдсэн 2018-03-26


Баян-Өлгий /МОНЦАМЭ/. УИХ-ын 2005 оны 74 тоот тогтоолоор Баян-Өлгий аймгийн Ногооннуур сумын нутаг дэвсгэрт “Цагааннуур” чөлөөт бүс байгуулах тухай шийдвэр гарч, хөрөнгө оруулалт 2008 оноос хийгдэж эхэлсэн билээ. Тус чөлөөт бүсийн өнөөгийн байдал, үйл ажиллагааны талаар чөлөөт бүсийн захирагч А.Аманкелдитэй ярилцлаа.

– УИХ-аас Цагааннуурын чөлөөт бүс байгуулах тухай шийдвэр гараад 13 жил өнгөрлөө. Одоо уг чөлөөт бүсийг нээх ажил хэр зэрэг урагшилж байна?

– Цагааннуурын чөлөөт бүсийн хөрөнгө оруулалт 2008 оноос хийгдэж эхэлсэн байгаа. Одоогоор тэрбум 360 сая төгрөгийн ажил хэрэгжсэн. Үүнд 705 га газарт харуул хамгаалалтын хашаа баригдаж, төрийн өмчийн компаниудын балансаас шилжиж ирсэн хэдэн барилгыг засаж сэлбэсэн л байдалтай байна.

 – Чөлөөт бүсийн үйл ажиллагааг эхлүүлэхийн тулд танай байгууллагын зүгээс ямар арга хэмжээ авч байна?

– Турк Улсаас хөрөнгө оруулалт татахаар ажиллаж байна. Уг асуудал жилийн өмнөөс хөндөгдөж эхэлсэн. Саяхан УИХ-ын даргын тус улсад хийсэн ажлын айлчлалын үеэр төрийн удирдлагуудын түвшинд бас дорвитой яригдлаа. Үүний араас Монгол-Туркийн Засгийн газар хоорондын комиссын хурал дээр чөлөөт бүсүүдийн тухай санамж бичиг байгуулагдаж, шаардлагатай хөрөнгө оруулалтыг Цагааннуурын чөлөөт бүсэд хийх тухай ярьсан юм. Бидний хувьд өөрсдийн боломж бололцоогоор чөлөөт бүсийг ойрын хугацаанд нээх чиглэлээр ажиллаж байна. Одоогоор зургаан аж ахуйн нэгжид газар олгосон. Дубайн хөрөнгө оруулалттай худалдаа наймааны чиглэлийн нэг компани газраа аваад үйл ажиллагаагаа эхлэх гэж байна. Долоо хоногийн өмнө архи, тамхи зэрэг бараа бүтээгдэхүүн борлуулах “DUTY FREE” дэлгүүрээ бариад дуусгалаа.

– Турк Улс аль чиглэлд хөрөнгө оруулахаар болсон вэ?

– Цагааннуур чөлөөт бүсийн ТЭЗҮ, ерөнхий төлөвлөгөө болон мастер төлөвлөгөөг хийж өгөх, дэд бүтцийн ажлуудад хөрөнгө оруулах саналтай явж байгаа. Гэхдээ одоогоор саналын түвшинд явж байгаа учраас хөрөнгө санхүүгийн талаар ярихад эрт байна.

 – Одоогоос хэдэн жилийн өмнө Канадын компаниуд хөрөнгө оруулах санал тавьсан гэж чөлөөт бүсийн тухайн үеийн удирдлагууд мэдэгдэж байсан. Энэ асуудал юу болсон вэ?

– Канад-Монголын хамтарсан компани Цагааннуур чөлөөт бүсэд хамгийн том буюу 100 га газар эзэмшиж байгаа. Тус газарт тээвэр ложистикийн төв, үйлдвэрлэл, үйлчилгээний парк, худалдааны төв байгуулахаар төлөвлөсөн. Одоохондоо хөрөнгө оруулалт нь гүйцэд орж ирээгүй, газрын төлбөр болох 56 сая төгрөгийг улсад тушаагаад байна. Эдийн засгийн болон улс төрийн зарим шалтгаануудын улмаас ажил нь хойшлогдсон. Энэ хавраас ажлаа эхэлнэ гэсэн төлөвлөгөөтэй байна.

 – Тулгамдаж буй ямар бэрхшээлүүд байна?

– Нэгдүгээрт, дэд бүтцийн асуудал байна. Хоёрдугаарт, мэргэжлийн байгууллагуудын хоорондох уялдаа холбоо муу байгаа. Баян-Өлгий аймаг дахь Гаалийн газартай бид нар хэл амаа ололцож чадахгүй байна.

 – Ямар асуудлаар ойлголцолд хүрээгүй вэ?

– Цагааннуурын чөлөөт бүс үйл ажиллагаагаа эхлүүлэхийн тулд гаалийн хяналт шалгалт заавал орсон байх ёстой. Тодорхой шалтгаануудын улмаас гаалийн хяналт шалгалт орж чадахгүй байна. Шалтгаан гэхээс илүү шалтаг гэж бид хараад байгаа.

 – Гаалийн газар ямар шалтаг, шалтгаан яриад байгаа юм бэ?

– Чөлөөт бүсийг бүрэн камержуулах, сүлжээнд хамруулах шаардлагыг тавьсан. Бид өөрсдийн бололцоогоороо камержуулалт, гэрэлтүүлгийн асуудлыг шийдсэн ч үүнийг стандартын шаардлага хангахгүй гэж үзэж байгаа. Уг асуудлыг цаашид засаж сайжруулахаар ажиллаж байна.

 – Цагааннуурын чөлөөт бүстэй холбоотой энэ жилийн улсын төсөв, дараа жилийн төсвийн төлөвлөгөөнд тусгагдсан санхүүжилт байна уу?

– Манай чөлөөт бүсэд 2011 оноос хойш улсын төсвөөс бараг хөрөнгө оруулалт хийгдээгүй. Энэ жил мөн адил байгаа. Харин 2019 онд цахилгааны шугам, зам талбай, гэрэлтүүлгийн ажлуудыг улсын төсвийн хөрөнгө, гадаадын зээл, тусламжаар хийхээр төлөвлөөд байна.

 – Тус чөлөөт бүсийн үйл ажиллагааг ойрын хугацаанд эхлүүлэхийн тулд хэчнээн хэмжээний хөрөнгө шаардагдаж байна?

– Конторын барилга, цахилгаан, зам талбай гээд нийтдээ 5 орчим тэрбум төгрөгийн хөрөнгө шийдэгдвэл чөлөөт бүсийн ажил жигдрээд явах боломжтой.

 – Чөлөөт бүсийн хашаа гэж том объект байна. Энэ хашааны харуул хамгаалалтын асуудлыг яаж шийдэж байна?

– Чөлөөт бүс бол хуулиар улсын онц чухал объектын жагсаалтад ордог. Тийм учраас хамгаалалтын асуудлыг төр бүрэн хариуцдаг юм. Одоо дотоодын цэргийн хамгаалалтад байгаа.

 – Танай ажлын албанд өнөөдөр хэчнээн хүн ажиллаж байна?

– Цагааннуурын чөлөөт бүсийн захирагчийн ажлын албанд 16 хүн ажилладаг. Үүнээс захиргааны болон хөрөнгө оруулалт хариуцсан 7-8 хүн Улаанбаатар хотод, дэд бүтэц, аж ахуй хариуцсан хүмүүс Баян-Өлгийд ажиллаж байгаа.

 – Цагааннуурын чөлөөт бүсийг бүрэн утгаар нь төдөн онд нээнэ гэсэн төлөвлөгөө байна уу?

– Дэлхийн жишгээр хөгжүүлэхэд нэлээн хугацаа шаардагдана. Гэхдээ гаалийн асуудал шийдэгдвэл өөрсдийнхөө боломж, бололцоогоороо маргааш ч ажиллахад бэлэн байна.

Ө.Нурболат


Цааш унших
0
0

Мэдээ  / Шинэ мэдээ
“ЦАГААННУУР” ЧӨЛӨӨТ БҮСЭД ГАЗАР ЭЗЭМШҮҮЛЭХ, АШИГЛУУЛАХ ТӨСӨЛ СОНГОН ШАЛГАРУУЛАЛТ
Admin нийтлэгдсэн 2018-03-16


“Цагааннуур” чөлөөт бүсийн Захирагчийн “Газар эзэмшүүлэх, ашиглуулах төсөл сонгон шалгаруулах тухай” 2018 оны 03-р сарын 15-ны өдрийн А/12 тоот захирамжийг үндэслэн Баян-Өлгий аймгийн Ногооннуур сумын 9 дүгээр баг, Цагааннуур тосгонд байрлах чөлөөт бүсээс газар эзэмшүүлэх, ашиглуулах төсөл сонгон шалгаруулалтыг зарлаж байна.
Үүнд:
“Цагааннуур” чөлөөт бүсийн эзэмшлийн газраас 20га газрыг үйлдвэрлэл, үйлчилгээ, худалдааны зориулалтаар …..
ЖИЧ:
-Төсөл хэрэгжүүлэгч нь өөрийн төсөлд шаардагдах хэмжээний газарт төслөө бичиж ирүүлнэ.
-Томоохон хэмжээний газар шаардагдах цогц төслийг Захирагчийн ажлын албанд шууд ирүүлж болно.
Шалгаруулалтанд оролцогчдыг бүртгэх болон төсөл хүлээн авах хугацаа;
2018 оны 03-р сарын 15-ны өдрөөс эхлэн 60 хоногийн хугацаатай зарлаж байна.
Төсөл хүлээн авах хаяг; Ж.Самбуугийн гудамж, Засгийн газрын 11-р байр Чингэлтэй дүүрэг, шуудангийн хайрцаг: 38/ 11
Утас: (976-51) 264026, 324026
Факс: (976-11) 324026
И-майл: tsagaannuurftz@yahoo.com

Төсөлд тавигдах сонгон шалгаруулалт татаж авах: Татах


Цааш унших
0
0

Мэдээ  / Шинэ мэдээ
“Цагааннуур” чөлөөт бүсэд газар эзэмшүүлэх, ашиглуулах төсөл сонгон шалгаруулалт
Admin нийтлэгдсэн 2018-02-21


“Цагааннуур” чөлөөт бүсийн Захирагчийн “Газар эзэмшүүлэх, ашиглуулах төсөл сонгон шалгаруулах тухай” 2018 оны 02-р сарын 20-ны өдрийн А/09 тоот захирамжийг үндэслэн Баян-Өлгий аймгийн Ногооннуур сумын 9 дүгээр баг, Цагааннуур тосгонд байрлах чөлөөт бүсээс газар эзэмшүүлэх, ашиглуулах төсөл сонгон шалгаруулалтыг зарлаж байна.

Үүнд:
“Цагааннуур” чөлөөт бүсийн эзэмшлийн газраас 3 га газрыг үйлчилгээний зориулалтаар …..
ЖИЧ:
-Төсөл хэрэгжүүлэгч нь өөрийн төсөлд шаардагдах хэмжээний газарт төслөө бичиж ирүүлнэ.
-Томоохон хэмжээний газар шаардагдах цогц төслийг Захирагчийн ажлын албанд шууд ирүүлж болно.
Шалгаруулалтанд оролцогчдыг бүртгэх болон төсөл хүлээн авах хугацаа;
2018 оны 02-р сарын 20-ны өдрөөс эхлэн 60 хоногийн хугацаатай зарлаж байна.
Төсөл хүлээн авах хаяг; Ж.Самбуугийн гудамж Засгийн газрын 11-р байр Чингэлтэй дүүрэг, шуудангийн хайрцаг: 38/ 11
Утас: (976-51) 264026, 324026
Факс: (976-11) 324026
И-майл: tsagaannuurftz@yahoo.com

Холбогдох материалыг доорх холбоосоор татаж авна уу.

Download (DOCX, 22KB)


Цааш унших
0
0

Мэдээ  / Шинэ мэдээ
Монгол Улсын Шадар сайд Ө.Энхтүвшин харьяа агентлагийн дарга нар болон Чөлөөт бүсийн Захирагчидтай хамтран ажиллах гэрээ байгууллаа
Admin нийтлэгдсэн 2018-02-11


Монгол улсын шадар сайд Ө.Энхтүвшин өөрийн эрхлэх асуудлын хүрээн дэхь агентлаг, чөлөөт бүсүүдийн үйл ажиллагааг оновчтой төлөвлөж хэрэгжүүлэх, төрийн албаны тухай хууль тогтоомжийг чанд сахиж, хариуцлагатай ажиллаж Төсвийн шууд захирагчийн тухайн жилд гүйцэтгэх үүрэг, хүлээх хариуцлагыг тодорхойлж өгөх зорилгоор 2018 оны хамтран ажиллах гэрээг Шударга өрсөлдөөн, хэрэглэгчийн төлөө газар, Мэргэжлийн хяналтын ерөнхий газар, Стандартчилал, хэмжил зүйн газар, Онцгой байдлын ерөнхий газар, Зам-Үүд, Цагааннуур, Алтанбулаг чөлөөт бүсийн удирдлагуудтай байгууллаа.

Шадар сайд агентлагийн дарга, чөлөөт бүсүүдийн Захирагч нарт хандаж “Цаашдаа ч тодорхой төлөвлөгөөний дагуу ажлаа цаг тухайд нь гүйцэтгэж, 2018 оны хамтран ажиллах гэрээгээ сайн биелүүлж хариуцлагатай ажиллах хэрэгтэй. Төрийн байгууллага бол ард түмэндээ үйлчлэх, тэдний тусын тулд ажиллах хэрэгтэй. Мөн тэрбээр 2018 он хариуцлагатай жил байхыг анхааруулж улс эх орныхоо эрх ашигт нийцэж, хуулиа дээдэлж үйл ажиллагаа явуулахыг сануулж тус бүрт нь үүрэг чиглэл өглөө.

2018 онд “Цагааннуур” чөлөөт бүсээс хэд хэдэн томоохон зорилт дэвшүүлэн ажиллах юм.

Тухайлбал:
1) “Цагааннуур”чөлөөт бүсийн үйл ажиллагааг эхлүүлэх
2) Дэд бүтцийн ажлуудыг эхлүүлэх. (улсын төсөв, гадаадын зээл тусламж, концесс г.м)
3) Гаалийн хяналтыг нэвтрүүлэх (Гаалийн ерөнхий газраас гаалийн байцаагч томилуулах)
4) Чөлөөт бүсээр дамжих транзит тээвэр, логистикийн сүлжээг хөгжүүлэх талаар нэгдсэн зураглал гаргаж тус үйлчилгээг бодлогоор дэмжих. АH-4 чиглэлийн авто замыг түшиглэн.


Цааш унших
0
0