Монголын Үндэсний Худалдаа аж үйлдвэрийн Танхим, ОХУ-ын Алтайн хязгаар мужийн Худалдаа аж үйлдвэрийн Танхимтай хамтран Монгол–Оросын бизнес уулзалтыг 2017 оны 11-р сарын 07-ны өдөр МҮХАҮТ-д зохион байгуулав.
Энэхүү хуралд “Цагааннуур” чөлөөт бүсийн ЗАА-ны дарга Ц.Итгэл, хөрөнгө оруулалт, хамтын ажиллагааны хэлтсийн дарга И.Хайратбек, бүсийн мэргэжилтэнүүд, МҮХАҮТ-ын ерөнхий нарийн бичгийн дарга Э.Оюунтэгш, ОХУ-ын Алтайн хязгаар мужийн Худалдаа аж үйлдвэрийн танхимын Ерөнхийлөгч Чесноков Борис Анатольевич, Алтайн хязгаар мужийн тослог үр тариа үйлдвэрлэдэг тоног төхөөрөмж, цэвэр үйлдвэрийн чацарганы шүүс болон өтгөрүүлсэн чацарганы тосны үйлдвэрлэл, төрөл бүрийн печень үйлдвэрлэл, гурил-үр тарианы бүтээгдэхүүн үйлдвэрлэл зэрэг газар тариалангийн салбарт үйл ажиллагаа эрхэлдэг аж ахуйн нэгжүүдийн төлөөлөл оролцож бүтээгдэхүүн үйлчилгээгээ танилцуулсан юм.
Арга хэмжээний хөтөлбөрийн хүрээнд тус чөлөөт бүсээс “Цагааннуур” чөлөөт бүсийн талаар танилцуулга хийв.
Цагааннуур чөлөөт бүс нь ОХУ-ын хилээс урагшаа 28 км-т буюу Евро-Азийг холбож буй АН-32 чиглэлийн авто замын дагууд оршдог. Баруун бүстэй хил залгаа ОХУ-ын Алтайн хязгаар, Новосибирск муж нь 5.0 сая орчим хүнтэй нь Монгол-ОХУ-ын худалдааны үйл ажиллагаагаа тэлэх хамгийн тохиромжтой газарзүйн байрлалтай болохын хувьд хоёр орны худалдаа, эдийн засгийн хамтын ажиллагааг өргөжүүлэхэд томоохон түлхэц үзүүлэх юм.
